Cronica fratrum Sancti Dominici in Camporegio de Senis,
Siena, Bibl. comunale B.VII.4

|72v| 439. Dum Romam peteret, reverendus pater lector frater Angelus Teodorus de Petracellis, huius cenobii filius, in conventu Sanctę Marię Centuncellarum in morbum incidit. Unde cum magna devotione petiit et recepit omnia ecchlesię sacramenta, et suum diem clausit extremum 17 novembris 1682. Et hec memoria debebat poni in pagina 69, a tergo, ubi notatur * signum.

1694

440. Die 4 augusti, hora tertia noctis, ad aeternam vitam transiit frater Franciscus Togniazzi Senensis, conversus professus huius nostri conventus, aetatis suę ann(orum) 58. Febri acutissima decem dierum correptus et sacramentis omnibus ręfectus. Fuit in questuando insignis, et parem non habuit pro ecclesię zelo ac necessitatibus conventus.

441. Die 21 novembris 1695, die lunę circa horam noctis, ab hominum consortio ad aliam vitam, sine ullo sacramento, transivit frater Dominicus Borselli, faber lignarius, conversus. Curam habens prędiorum villę vulgo dictę Casenovole, fuit aggressus ex improviso a famulo equitis Bernardini Alderani de Palmieris, nobiscum |73r| confinante ibidem (cuius nomen Carolus, qui ann(os) septendecim in triremis fuerat ut subiret pęnas suorum facinorum); ab eodem et schopo et ictibus acutissimi pugionis percusso, mortem sub eius manibus inhumaniter subiit, nullo succurrente. Filius erat nostri conventus, annorum autem sexaginta. Fuit tumulatus intra arcam ligneam in cęmeterio ecclesię ibidem sitę, loco  dicto Casenovole, pręsente patre lectore fratre Iulio Andreocci, conventus camerario, priore admodum reverendo patre lectore fratre Enrico de Savinis.

442. Die 14 maii 1696, consumato cursu annorum 40^a, ad alteram vitam transiit frater Agnellus, conversus, lucensis, munitus omnibus sacramentis.

443. Die 19 iunii 1696 e mortalibus ereptus, ad immortalem transiit vitam reverendus pater magister frater Petrus Martir Burghesius, annorum 71, recepto viatico; oleo autem s(acro) caruit eo quod hora 15, dum patres choro interessent, improviso accidente superveniente, in eodem occubuit. In sepulchro patrum sepulturam habuit. Fuit hic reverendus pater nostri cęnobii valde benemeritus, virtutibus et sapientia ac bono exemplo ornatus. Fuit per annos triginta quinque professor publicus sacrę theologię in hac sęnensi universitate. Pręfuit conventui, ac baccalaureatus et regentię officium habuit. Sacristię nostrę multa bona fecit, mantiunculas quasdam sub conventu ędificavit.

|73v| 444. Die 4 februarii 1697 Romę in conventu Sanctę Marię super Minervam aeternam vitam transii<t> admodum reverendus pater lector frater Raymundus Gasperinus, filius huius nostri conventus; sacramentis munitus et in cęmeterio sive communi patrum sepultura sepultus, ętatis suę anno quinquagesimo secundo. Fuit prędicator annualis hic in nostro conventu, et etiam patribus pręfuit. Pavimentum claustri funditus restauravit, ea solum in parte quę ad exitum tendit. In organis pulsandis fuit percelebris; in moribus et literis atque in agendis sufficiens.

445. Die 3 aprilis 1697 e vivis repente ablatus est reverendus pater magister frater Thomas Maria Angeloni Senensis, decus huius venerabilis cęnobii, annorum circiter 65. Dum enim cum cęteris patribus in choro missam psallebat, improviso accidenti apopletico correptus, loquelam amisit et cęterorum usum membrorum. Propterea sola extrema untione recepta, die sequenti, quę fuit 3 aprilis, hora xj spiritum emisit, et celebri funere fuit tumulatus in seculchro patrum. Quinquies pręfuit conventui; annis 30 fuit rector insignis oratorii Sanctę Marię de Scala, intra septa magni nostri xenodochii. Per annos |74r| plurimos philosophyamn docuit alumnos Sancti Georgii. Fuit lector honorarius publicę nostrę universitatis. Infaticabili labore assiduus in adsistendis confessionibus; nobilium fęmminarum habuit celebrem concursum, et earumdem domorum limina frequentius terebat, absque ulla admiratione. Vir vere scientia, prudentia, sagacitate et fortuna pręditus. Fuit sac(rę) inquisitionis consultor et tandem quoque examinator synodalis. Vir vere famosus in hac civitate, et in tota Romana provincia notus atque celeberrimus. Requiescat in pace.

446. Die duodecima maii 1701 obiit frater Christophorus Salvini de Senis, conversus, annorum saxaginta quatuor. Qui per plures annos, bonorum conventus apud oppidum Castri Novi existentium sedulo ac fideliter curam egit; per(?) quod tempus prędicta prędia non solum exornavit sed etiam fęliciter auxit. Unde die noctuque laborans, gravi ac longo morbo contracto, suorum operum pręmium percepturus sacramentis susceptis placide apud nos obdormivit in Domino.

447. Die decima nona maii 1701 Creatori suo, post sacramentorum susceptionem, spiritum reddidit reverendus pater magister Antonius Ronconi Senensis, et huius conventus filius; ubi lectoris et prioris semel, camerarii per plures annos gessit officium. Aliis pariter inferioribus pręfuit cęnobiis. Longa demum infirmitate magis quam senio confectus, obiit ętatis suę anno septuagesimo quarto.

|74v| 448. Męsta denunciati fuerunt epistola huius c(onventus) nobis religiosi e vita cessisse, circa finem mensis maii 1702, patrem Amadeum Gio. Domenici, huius conventus filium, sacrę studentem doctrinę in papiensi collegio mirificem, in illa proficiscentem. Sed assidua coactus ęgritudine, dum in patriam suam de Carraria Massam proficiscitur. Ibi tandem, in parentum suorum domo susceptis ecclesię sacramentis - ut ex matris habemus testimonio - obiit ętatis flore; pręclaras quas de illo quisque conceperat spes, defraudans.

449. Reverendus pater frater Benedictus M. Ghini Senensis. Bonus religiosus; licet non multum literatus, in agendis vero aliquantulum solers, ad sacras reliquias in tabellis disponendas bene aptus. Prefuit in conventu Sancti Spiritus, Sancti Geminiani, et bis Aretii. In quo, gulę inflammatione correptus, brevi horarum spatio, sexagenarius diem clausit extremum die 25 aprilis 1703.

450. Frater Ioseph, conversus novitius, aromatarius in hoc conventu. Ethicus obiit, receptis ecclesię sacramentis die 27 aprilis 1704.

451. Reverendus pater frater Dominicus Maria Acharigi. Bonus religiosus in omnibus comunitatis exercitiis, sęquela chori et audiendis sęcularium confessionibus assiduus. Oratorii nobilium |75r| Sanctę Marię de Scala supra septem annos pręfuit corrector. Huius conventus pluries vicarius et supprior. Apud omnes bonę ęstimationis fuit. In ętate annorum 77^em, de quibus 64 in religione transactis, receptis ecclesię sacramentis, die dominico, quę fuit decima septima augusti, hora quasi quintadecima, anno Domini 1704, in cinerem revertens sub lapide patrum requiescit in pace.

452. Frater Stephanus Cortini, conversus. Circa sexagesimum sextum percurrens annum, ex tumore gulę correptus, ecclesię sacramentis munitus, in cinerem reversus est die 13 maii 1707. Requiescat in pace.

453. Die 12 settembris 1708 in conventu Sancti Thomę de Floriano mortem subiit temporalem, oleo sancto prius et solo devote percepto, reverendus admodum pater frater Thomas Cavalcanti, nobilis sęnensis, lector artium ac sacrę theologię, prędicator generalis et filius huius venerabilis conventus, annos habens tres supra sexaginta. |75v| Iste religiosus bonorum fuit morum, multa bona contulit nostro conventui, pręcipue aromatariam fundavit, ornavitque ecclęsiam ex nuceis scamnis. Pręfuit hic et in pluribus aliis nostrę provincię cęnobiis, prędicavitque, legitque theologiam. Et in sudore vultus sui congregata pęcunia, reliquit totum in suo deposito pro utilitate sui conventus. Requie<s>cat in pace.

454. Die 2 novembris 1708. In pace requievit, sumptis sacramentis, reverendus pater lector frater Vincentius Lucchi Senensis, et filius conventus.

455. Reverendus pater frater Iyacinthus M^a. Mari, predicator generalis. Iam nonagesimum percurrens annum et septuagesimum secundum religionis, vitę exemplaris, gratiosus concionator, in audiendis sęcularium et monialium confessionibus |76r| assiduus, prioris onere pluries decoratus, opus Sacro ritiro di dieci giorni in lucem ędidit. Vari<i>s sacristię relictis ornamentis, die 27 ianuarii 1712, circa horam noctis, omnibus ecclesię munitus sacramentis, in viam ęternę lucis ingressus, in pace quiescit.

456. Frater Antoninus Giannini Florentinus, bonus, ornatus moribus. Habitu conversi suscepto, dum ad approbationem novitiatus esset ingressurus, thisi correptus morbo inter celicolas ascriptus est die 20 martii ora 23, 1716.

457. Frater Ioannes della Crux, conversus, ex Ollandię civitate Nimega ortus. Bonus religiosus, vestiarius et quęstor, bino armario sacristiam ornavit et horologio. Sacramentis ecclesię munitus, die 30 martii 1716 suorum suscepit stipendia męritorum.

458. Frater Fortunatus Giuliani, conversus, lucensis, conventus aretini. Annum agens 38, suorum recipiens stipendia męritorum, sepultus est cum fratribus die 21 octobris 1716.