| ⌂ |
Chronica conventus Sancti Marci de Florentia OP ■ Firenze, Bibl. Laurenziana, S. Marco 370 ■ |
||
|
|
|
||
| ⌂ |
Chronica conventus Sancti Marci de Florentia OP ■ Firenze, Bibl. Laurenziana, S. Marco 370 ■ |
||
|
|
|
||
|160r|
144. Frater Nicolaus Laurentii Strozae de Florentia, nativus huius conventus, diaconus ordine, anno aetatis xxiiijto circiter, coram fratribus lacrymantibus et maerentibus quod tanti iuvenis doctrina, ope, consilio et grata consuetudine privarentur. De suae ipsius conscientię conscius puritate, sacrosancto Christi fide precipua libato corpore, reliquis etiam adhibitis sacramentis, intrepidus, hilaris et iucundus requievit in pace in hoc conventu, ubi per dies aliquot acutissimis febribus constantissime laborarat, die xxma mensis iunii 1504. Iuvenis et moribus et genere clarus. Prudentia summa preditus, ingenio excellenti, eruditione per aetatem praecipua, mitis et humilis corde, de quo cuncta pro votis et religionis utilitate speranda forent. Vale virtutum sacrarium, vale anima Dei grata!
145. Frater Petrus Paulus de Urbino, nativus huius conventus, in ordine sacerdos, natus annorum circiter Liijium, quietissime obiit in hoc conventu, omnibus sacrementis adhibitis, die 27 augusti 1504, hora diei 12ma. Hic in saeculo physicus peritissimus atque suae artis in urbe Florentia admodum acceptus. Vir erat mirae charitatis, quippe qui pauperes aegrotantes in urbe non modo et viseret et de sua arte consuleret, sed et multotiens medicinas et alia necessaria suis sumptibus compararet. Bono igitur exemplo ad religionem veniens, in ea summa cum humilitate et pro debilissimo suo corpore observantia, octo circiter annos probe perseveravit. Cuius anima requiescat in pace.
146. Frater Angelus Lucę de Panzano de Florentia, nativus huius conventus, in ordine sacerdos, quietissime obiit die 7a septembris 1504, sacramentis rite adhibitis. Hic nomine et conversatione angelus, cunctarum virtutum et religionis specimen fuit, praecipui silentii et cuiusdam iucundissimę gravitatis. Qui cum remota quadam phthiseos specie annos plures comsumeretur, ab observantia tamen regularí numquam defecit, divinis officiis intentus et assiduus precibus. Cantor modulatissimus. Requiescat in pace.
147. Frater Iohachinus magistri Lucę de Sancto Geminiamo, nativus huius conventus, paucos ante dies sacerdotio functus vita laudabiliter defunctus est Senis in conventu Sancti Spiritus die 30 septembris 1505. Qui se componendis moribus strictissimoque silentio tradens paucos intra annos mirifice religione et doctrina profecit.
■ Suo fratello fra Bernardo (OP 1507, † 1533), n° 310.
148. Frater Thaddeus Raynaldi de Calamech, oppido comitatus pistoriensis, nativus pistoriensis conventus, sacerdos iuvenis, valde humilis et devotus ac maximę puritatis vasculum. Ingressus est enim ordinem antequam conventus ille reformaretur, annum agens xijm, in quo purissime et devote se gessit, optimus cantor. Post diuturnam aegritudinem, devotissime diem extremam obiit in hoc conventu die < . . . . . > MDV°.
149. Frater Iohannes Iob textoris de Florentia, nativus huius conventus, sacerdos, anno aetatis xxxvij circiter, post diuturnam phthiseos egritudinem, constantissime et sine murmure toleratam, obiit devotissime in hoc conventu kalendis iunii MDvj°, nona diei hora circa. Vir religiosus, literis hebreis et in sacra scriptura eruditus.
|160v|
Tempore prioratus [1506-07] fratris Nicolai Schembergh de Alemannia:
150. Frater Cosmas Clari de Florentia, nativus conventus saxensis, ordine subdiaconus, iuvenis bonę devotionis et charitatis. Obiit in hoc conventu die 14 ianuarii, post matutinas, 1506. Requiescat in pace.
151. Frater Franciscus Salviatus Bernardi ser Cambii de Florentia, huius conventus filius, in quo et quater prior prefuit, precipuo religionis exemplo. Ex egritudine pectorali, sacramentis devotissime sumptis, anno aetatis Lxiiijto, in hoc conventu in Domino requievit die ix martii 1506, hora noctis insequentis diei 2a et ½a. Hic annos xlvijm egit in ordine, tanta puritate et exemplo ut in statu, habitu et in omni corporis motu, velut novitius videretur. Qui iugum Domini ab adulescentia sua portavit; multoque tempore in religione praelaturę muneribus, in diversis conventibus adhibitus est. Fuit quoque semel vicarius generalis huius Congregationis Thuscię reformatę. Denique plenus dierum ac bonorum operum, requievit in pace, amen.
151bis. Frater Romualdus de Laterina obiit in conventu Sancti Romani, Luce, die . . . 1508.
■ voce aggiunta nel margine sinistro, mano del primo continuatore dell'Ubaldini, n° 153 ss.
Tempore prioratus fratris Barptholomei Faventini:
152. Frater Ludovicus Angeli Tuccii bibliopolę de Florentia, nativus huius conventus, sacerdos, longevus anno xlviij a sua in ordine professione, in qua probe et laudabiliter semper vixit. Denique plenus dierum et bonorum operum, obiit in conventu fesulano, sacramentis rite percetpis, anno Domini MDviiij, die viija aprilis. Cuius anima Deus in paradisum suscipere dignatus sit, amen.
■ con quest'ultima nota biografica n° 152, in f. 160v, data ultima data cronica 14.IV.1509, termina la mano del primo copista (fra Roberto Ubaldini da Gagliano); nel marg. sinistro, lunga nota soppressa e illeggibile; subentra altra mano, meno regolata e più corsiva.
153. Frater Simon de Petra Sancta, sacerdos, obiit 4 maii 1509 ex phtisi, qui diu ex tali egritudine laboraverat, fracta vena pectoris. Et in fine perceptis omnibus ecclesiasticis sacramentis immediate post verspera migravit a seculo. Cuius anima requievit in pace.
Tempore prioratus [1509-11] fratris Iohannis Marie Canisiani de Florentia:
154. Frater Dominicus Guidacii de Pecoris, huius conventus filius nativus, ordine sacerdos. Postquam in hoc ordine xviij° annos cum dimidio, moribus satis ornatus, regularem observantiam summa cum diligentia excoluit, iugumque Domini suave et leve ab adolescentia sua cum maxima charitatis fervore portavit, demum anno Domini MDviiij°, die xviiij° me<n>sis iulii, hora xxa, omnibus eclesie sacramentis debite susceptis, diem clausit extremum. Sepultusque est in sepultura fratrum ante portam chori nostri, ex parte dextra. Cuius anima requiescat semper.
155. Frater Petrus Paulus Felicis de Beccuto Florentinus, sacerdos. Sacramentis omnibus rite perceptis, obiit die xx iulii 1510, hora 12a, sepultus hora 17a in sepulchro fratrum, ante portam chori.
156. Frater Angelus Michaelis de Florentia, iuvenis, diaconus, filius conventus pratensis. Obiit die 3 augusti 1510, hora scilicet tertia noctis, sepultus hora diere sequentis 14, in eodem sepulchro fratrum, ante chorum.
157. Frater Maurelius Nicolai Savonarole Ferrariensis, sacerdos, germanus fratris Hieronymi Savonarole. Obiit Lucę in conventu Sancti Romani, asmaticus et infirmus longo rempore, cum optima patientia et exemplo. Qui passus est exilium a Dominio florentino postquam frater eius fuit combustus; et tandem sancto fine quievit ex hoc exilio ad celestem patriam revocatus die 28 decembris M.D.x°. Cuius anima oret pro nobis ad dominum Iesum Christum.
|161r|
Tempore prioratus prefati fratris Ioannis [Ioanne scr.] Canigiani:
158. Frater Malatesta Sacramorus de Arimino, filius nativus huius conventus, quamvis postea translatus fuerat ad Congregationem Lombardie et factus filius conventus ariminensis. In seculo canonicus cathedralis ecclesie fiorentine, et iuris pontificii doctor. Cum plures prioratus exercuisset in hac provincia et vicarius generalis tertius fuisset, tum etiam in Lombardia prior Arimini et Parme fuisset, demum vocatus a rev.mo magistro ordinis fratre Thomma de Vio Caietano ac eius socius factus et provincialis Terre Sancte. Missus est ab eodem Bononiam, ubi tunc pontifex cum sua curia residebat, et suus vicarius ibidem factus et procurator ordinis. Cum visitasset rev.mum protectorem ordinis nuper creatum, et fuisset in castra apud opidum Mirandule, ubi pontifex et prefatus cardinalis tunc erat, passus est non modicum incomodum propter inmensum frigus et multitudinem nivium, cum esset de mense ian(uarii). Reversus Bononiam et infirmatus, paucis diebus mortuus est, receptis devotissime omnibus ecclesie sacramentis. Fuit autem eius transitus die xija februarii anni MDx° more fiorentino. Cuius anima requiescat in pace.
Tempore prioratus [1511-13] fratris Sanctes de Luca:
159. Frater Constantius Lucę de Burgo ad Sanctum Sepulcrum, sacerdos, optimus scriptor. Ex phtisi obiit in Sancto Marco die 8 augusti 1511, perceptis omnibus sacramentis ecclesie. Migravit autem mane in ortu solis. Cuius anima requiescat in pace.
Frater Bernardinus de Castro Francho Arni superioris, sacerdos, magne simplicitatis et puritatis et promptissime obedientie. Obiit in Sancto Marco die 23 augusti 1511, mane ante nonam noctis horam, immediate post dictas mattutinas, die sabati in vigilia Sancti Bartholomei apostoli.161. Frater Lucianus de Bilioctis, sacerdos, bonus utilis et valde obediens. Ex obedientia sibi iniuncta, associavit fratre infirmos ad balnea vulterranea; et ibi infirmatus vehementi febre, venit ad Sanctum Geminianum in conventu nostro, et ibi crescente infirmitate in paucis diebus extinctus est. Obiit autem die 16 septembris 1511, videlicet precedenti nocte, in dimidio noctis scilicet hora sexta.
162. Frater Thadeus Antonii Zacharie, sacerdos, obiit in hoc conventu die 28 novembris 1511, et tunc assignatus erat in conventu Sancti Miniatis. Reversus enim fuerat ex balneis Sancti Philippi, et per aliquos menses infirmus; tandem die predicta, hora prima noctis obiit, perceptis omnibus ecclesiasticis sacramentis. Cuius anima requiescat in pace, amen.
163. Frater Vincentius Rodulphi de Summaria, obiit ex ptisi die 19 maii 1512, mane circa auroram in vigilia Ascensionis Domini. Cuius anima in celum ad Christum ascendat. Erat autem subdiaconus et adhuc sub cura magistri novitiorum, iuvenis mitis, humilis, modestus, devotus et obediens. Die autem precedente obitum suum, presentibus duobus fratribus - uno sacerdote et altero diacono - vidit ipse infirmus locum sibi preparatum glorie sue, vidit et Cristum ac matrem eius Mariam, vidit angelos et sanctos; ac quosdam fratres ordinis nostri defunctos, quibus loquebatur dulciter, et gratias eis agebat. Et incitabat predictos duos fratres, qui eum costodiebant, ut cantarent. Qui vocem quidem eius efficaciter loquentis audiebant sed nihil videbant, sed pre dulcedine lacrimas fundebant, et huius rei testes fuerunt. Per omnia benedictus Deus, amen.
164. Frater Stephanus, conversus, del Migliore de Florentia, filius nativus conventus Sancti Dominici de Pistorio. Obiit in conventu nostro assignatus, die 26 iulii 1512, mane circa horam undecimam. Cuius anima requiescat in pace, amen.
|161v|
165. Frater Franciscus Pauli de Albiçis de Florentia, sacerdos, obiit in conventu Sancte Chaterine de Pisis, die 5 septembris 1512. Cuius anima requiescat in pace, amen.
166. Frater Franciscus Maria Antonii de Ghondis de Florentia, sacerdos, obiit Rome apud Sanctum Silvestrum in Monte Exquilino, die 26 septembris 1512. Erat autem in agibilibus plurimum expertus, et tunc aliquas vices gerebat procuratoris in curia Romana in absentia rev.di procuratoris. Cuius anima pro suo labore celestia regna possideat.
■ A.F. Verde - E. Giaconi, Epistolario di fra Vincenzo Mainardi..., MD 23 (1992) XLVIII, 161-65.
167. Frater Clemens Francisci Astoris, conversus, obiit die 28 decembris 1512, post solis occasum. Cuius anima in celesti regno cum gaudio recipiatur.
168. Frater Bernardus Ghardi de Florentia, obiit die 12 aprilis 1513, mane circa horam duodecimam. Cuius anima requiescat in pace, cum diu vixerit in ordine.
169. Frater Andreas, tertii habitus, obiit die 17 aprilis 1513, mane circa horam duodecimam.
Tempore prioratus [1513-15] fratris Philippi Strozii:
170. Frater Cyprianus Petri de Cancellis ultra Pontem ad Sevem, sacerdos, obiit die 3 iulii 1513, circa horam diei 20am, acceptis omnibus sacramentis. Hic sacerdos optimis moribus preditus, gratus erat fratribus et secularibus. Non parcebat labori, vacans continue saluti animarum in audiendis confessionibus. Hic fuit primus fundator societatis et confraternitatis intitulate "De Assumptione beate Marie virginis", que vulgo appellatur "Societas contemplantium". Mortuus est autem ex dolore maximo intestinorum infra octo dies, et erat tunc prior in conventu Sancti Dominici de Prato; et obiit in conventu nostro Sancti Marci, cuius erat filius nativus. Cuius anima requiescat in pace, in gloria celesti.
■ Cf. AA.VV., San Domenico di Fiesole tra storia, arte e spiritualità, MD 40 (2009) 137.
171. Frater Andreas, conversus, pictor. Migravit 20 ianuarii 1513, receptis omnibus sacramentis.
Frater Georgius Antonius Vespuccius, sacerdos, qui ecclesię cathedralis florentine canonicus et prepositus fuerat, literis grecis et latinis apprime eruditus, moribus vero ita institutus ut specimen civitatis et diceretur et esset. Cum iam senex et aetate provectus nostrum ordinem introisset, vixissetque quasi puer innocentissimus, tandem migravit e saeculo xvij aprilis 1514, sub ortum solis, in conventu fesulano, ubi plurimos annos fuerat ut quietius viveret. Erudivit autem pater hic iuventutem florentinam, ac praesertim nobiles, non minus moribus quam literis latinis et grecis. Huius sunt in bibliotheca codices tum greci tum latini quamplurimi, quos vel ipse sibi scripserat vel hinc inde conquisierat. Diligentissimus et scrupulosissimus amator ac servator cuiuscumque generis librorum; ut cui vita etiam etiam ipsa, chariores essent codices et literae. Cum vero commendandus sit in omni fere genere virtutum, in eo maxime prestitit et excelluit quod a maledicentia semper alienus, |162r| quoscumque etiam peccatores excusare nitebatur. Receptis tandem omnibus de more sacramentis, in Resurrectione Domini, in 2a feria, diem clausit extremum. Cuius utinam apud Deum precibus in hoc vitę cuniculo sublevemur.173. Frater Thymoteus de Casentino, diaconus, filius conventus pratensis. In hoc conventu obiit die . . maii 1514, receptis omnibus sacramentis.
174. Frater Laurentius Ioseph, sacerdos, obiit Iliceti, quo biennium ante missus fuerat, ne clamoribus suis ac fatuitatibus fratres molestaret. Inciderat enim in mentis maximam diminutionem, ita ut numquam sui compos esset. Putatur autem in hoc incidisse ob rigidam austeritatem et scrupulosam perplexionem, cum nimis omnino arduam vivendi formam arripuisset. Requiescat in pace.
175. Frater Leonardus Petri Collensis de Valle Elsae, sacerdos optimus, et saluti animarium semper intentus, quas audiendo confessiones, ad Christum congregabat. Senis in conventu Sancti Spiritus decessit 6 novembris 1514; incuria, sive ut melius dicam, studio celebrandi et confessiones audidendi celerius quam par esset. Bis enim, eodem anno, ita exigente morbo (herniosus enim erat) se in medicorum manus coniecerat; qui testes rescindendo cum(?)vellent(?), cumque in prima curatione - que Florentie facta est - incolumis evasisset, in altera Senis membrorum ac nervorum contractione decessit. Hic ante assumptum habitum, decretis pontificiis in publicis studiis opera dederat. Bonus proculdubio pater; et qui, sumptis devote sacramentis, ad caelos creditur evolasse. Requiescat in pace, amen.
Tempore prioratus [1515-17] fratris Hieronymi de Pistorio:
176. Frater Simplicianus de Mantua, conversus, tonsor optimus, et curandis egris aptissimus. Miserabili casu et flebili, Lucae in conventu Sancti Romani diem clausit extremum: percussus enim gladio, nullis potuit ita fomentis retineri quin intra quadriduum expiraret. Susceptis tamen omnibus sacramentis obiit. Requiescat in pace, amen. Ultima vero die iulii 1515 obiit.